ERIK VAN OPHAOVE Prins

KV D’n Uul van den Grauwert

Foto: Thieu Smeets - Mofert

Oze nuje veurgenger is bekindj! Prins Erik III zweijtj kómmendj vastelaovessezoen de scepter euver ’t riek van D’n Uul van den Grauwert in Mofert. Op 12 november waerdje Erik van Ophoven, onger ’t toezeendj oug vanne Raod van Èllef en väöl anger belangstillendje oetgerope toet Prins Erik III. Same mit zien Prinses Julia (Kurvers) zal hae ós dit jaor veur gaon!

 

Prins Erik III is de middelste van 3 zeuns van aad Jubileum Prins Jan I (1983) en prinses Ria. Hae is 29 jaore jónk en al ’n aantal jaor lid van oos vastelaovesvereniging. Erik is ‘ne echte Moferter jong en vastelaovesgek in hert en nere. In ’t dagelijks laeve verdeentj d’r de kós es acountmanager Food & Agri bie Rabobank Centraal Zuid-limburg in Bocholtz. Van Zöstere toet Vaols adviseert d’r agrarische ongernummers. In ziene vriejen tied spendeertj d’r hieël get oere aan ziene mooshaof en is d’r ‘ne leefhöbber van aad gesjieër (trekterkes en alles waat inne hef en ane trékhaok kintj). Daonaeve ‘probeertj’ d’r ei paar kïeer inne waek aan get gewichte te bruike bie Sportcity in Ech. Erik maak es secretaris deil oet van ’t dagelijks bestuur vanne vastelaovesvereniging en is daonaeve nag in diverse commissies actief. Van kindjs-aaf-aan duit hae al mit ane optoch in Mofert. Kortóm: dé gewinsde prins veur D’n Uul van den Grauwert!

 

’t Prinselijk gezelsjap in Mofert wuuertj gecompleteerdj door Bob van Ophoven, Vincent van Montfort, Frans Cuijpers en Jens op het Veld. Veer gooj vrunj van Erik, die ‘m dit sezoen es adjudant zalle biestaon. Prins Erik III zal dit vastelaovessezoen regere euver ’t riek van d’n Uul van den Grauwert onger ziene liefspreuk:

 

“Hoeag promilaasj, väöl ravaasj!”

Karnavalsvereniging "Den Uul van den Grauwert"
 

Volg os:

  • Facebook Social Icon
  • Flickr Social Icon