Prins Stefan I, 2020

Prins Stefan I – KV D’n Uul van den Grauwert Mofert

 

Oze nuje prins is bekindj! Stefan Coenen zweijtj kómmendj vastelaovessezoen es Prins Stefan I de scepter euver ’t riek van D’n Uul van den Grauwert. Onger toezeendj oug vanne Raod van Èllef en väöl belangstillendje waerdje hae op zaoterdig 16 november oetgerope. Same mit zien drie adjudante Dennis, Frank en Johan zal Prins Stefan I Mofert veurgaon op waeg nao de vastelaovendj van 2020.

 

Stefan is gebaore en getaoge in Mofert en kan zich mit rech eine echte Moferter jong numme. Hae is 44 jaor jónk en geit es vriegezel door ’t laeve. Dochter Fleur is ziene groeate trots. Stefan is al 24 jaor lid van oos sjoean vastelaovesvereniging en altied vanne partie es ’t om vastelaovendj viere geit, van smorges vreug toet saoves laat. Nao al die jaore geit ziene wins om Prins te waere dit jaor in vervulling.

 

In ’t dagelijks laeve is oze Prins aan ’t werk es teamleider bie Eriks Aandrijftechniek in Remunj. Ziene vrieje tied besteedj Stefan gaer same mit dochter Fleur, same leuke dinger doon. Daonaeve geit d’r gaer op stap en drink zich daobie gaer ’n lekker glaeske beer. Hae is lid vanne Golfbiljartclub Biej De Vogel en speeltj in ‘t 35+ team van voetbalclub SNA. Inne wintjermaondje is d’r mit de vastelaovesvereniging op paad, wo ouch de meiste van zien vrunj bie zeen. Es d’r dan nag tied euverblief, wuuertj oppe tillevies sport, ’n serie, of ’n film gekeke, of ’n good book gelaeze.

 

Prins Stefan I zal dit jaor de vastelaovendj in Mofert veurgaon, same mit drie van zien biste vrunj es adjudante: Dennis Zeelen, Frank Cremers en Johan van Pol. Zie zalle d’r same mit de res vanne raod van èllef, de dames en de luuj van Mofert ein onvergaetelijk vastelaovessezoen van gaon make. Prins Stefan I regeertj ónger ziene liefspreuk: “Daag te kort, nachte lank!”

 

Foto: Thieu Smeets - Mofert

Karnavalsvereniging "Den Uul van den Grauwert"
 

Volg os:

  • Facebook Social Icon
  • Flickr Social Icon