Vastelaovesvereniging Den Uul van den Grauwert vindj zienen oorspróng in `t jaor 1906. In det jaor waerdje d’r in Mofert `ne historischen optoch gehajen en `n vastelaovesgezèt oetgegaeve. Dit alles haet plaatsgevónjen op 18 februari, de zónjig veure vastelaovendj. Daen datum weurd dan ouch besjouwd es d’n datum vannen oprichting van Den Uul van den Grauwert, mer van `n echte vereniging waas waarsjienlik nag neet ech sprake. Waal waas d’r `ne prins en `ne raod van èllef. Mer doe numdje ze det neet de prins, mer d’n drosserd. D’n drosserd woondje vreuger op Kestieël Mofert. Hae bestuurdje `t Amb Mofert names de grave en de hertoge van Gelder, wobie `t Amb Mofert behuuerdje.
Wie kump de vereniging aan ziene naam?
De vastelaovesgezèt waat in 1906 waerdjen oetgegaeve waas getiteld “DEN UUL VAN DEN GRAUWERT”. De gezèt waerdje ouch gesjreve door D’n Uul zelf. Veer konne dus eigelik zègke det de vereniging de naam te danken haet ane vastelaovesgezèt, en neet angesóm. De Grauwert is `nen agere naam veur `t kestieël van Mofert. Soms wuuertj ouch de hoofdtore van `t kestieël “De Grauwert” geneump, meh de sjrievers vanne gezèt höbbe toch `t kestieël in zie gehieël bedoeld. D’n Uul sjrief in zien gezèt: “Dao ig mich noew beschouw es de lèste aafstammeling van mien groote veurzaite, om de inwoners mer zoo erm meugelik te make en zoo veul es se mer koste ze mit de knoet te regeeren op zich russisch, dao veur wil ig nach aanspraok make op det gescheft van mien veurajers en proclameer mig tot Drosserd van Mofert.”