Prins Frank IV – KV D’n Uul van den Grauwert Mofert

 

Oze nuje prins is bekindj! Frank Cremers zweijtj kómmendj vastelaovessezoen es Prins Frank IV de scepter euver ’t riek van D’n Uul van den Grauwert. Ónger toezeendj ouch vanne Raod van Èllef en väöl anger belangstèllendje waerdje hae op zaoterdig 12 november oetgerope op oos gezellig Prinsebal inne zaal bie de Vogel. Nao ’n jaor sónger vastelaovendj en ’n jaor mit ’n bietje vastelaovendj volg hae Prins Stefan I ’20 op en geit d’r same mit zien veer adjudante Jack, Joost, Robert en Tim veurop in Mofert, op waeg nao de vastelaovendj van 2023.

 

Frank is gebaore in Remunj, mer getaoge in Mofert en kan zich dus mit rech eine echte Moferter jong numme. Mit nag mer net 40 jaor oppe tèller geit hae es vriegezel door ’t laeve. Dochter Veerle (14) en zoon Senn (11) zeen ziene groeate trots. En ouch zie viere allebei gaer vastelaovendj.

 

Veer kinne Frank mit rech eine echte vastelaovesvierder numme. Jaorelank ging hae es trombonis en kapelmeister veurop bie oos beroemdje prinsekapel Eine Ongerein. Hae is ouch alweer bienao 10 jaor actief es lid van oos sjoean vastelaovesvereniging, wovan de lèste jaore es bestuurslid. Nao al die jaore geit noe ziene wins om Prins te waere in vervulling. Frank de veerdje van D’n Uul van den Grauwert, mer d’n ieëste vanne Kluut en de ieëste van Eine Óngerein.

 

Nao jaore lank es loeadgeter gewèrk te höbbe, begós Frank aafgeloupe jaor aan ’n nuuj oetdaging begós inne hydrauliek bie REPTeQ. Daoveur is d’r ’t grótste deil vanne waek in ’t noorde van ’t landj. Mer netuurlijk neet in ’t weekend en ouch neet es ’t tied is veur vastelaovendj. Ziene vrieje tied besteedj Frank gaer mit de kinjer. Sporte vintj d’r ouch sjoean, mer veural om te kieke. Hae is dan ouch regelmaotig te vinje es “hooligan” oppe tribune bie Fortuna in Zitterd. Hae kiek ouch gaer nao autosport en in ’t biezunjer formule 1, zoeawaal oppe tillevies es live in Spielberg Oeasterriek. In ’t weekend vinjs se Frank mit zien vrunj, zien pilske en zien sigretje aan ’t buffet bie de Vogel inne cafe. Daonaeve is d’r ouch nag muzikaal actief es trombonis bie fieësband “Uncovered”.

 

Prins Frank IV zal dit jaor de vastelaovendj in Mofert veurgaon, same mit zien veer vrunj es adjudante: Jack Craenen, Joost Marx, Robert Hendriks en Tim Bremmers. Zie zalle d’r same mit de res vanne vastelaovesvereniging én alle luuj van Mofert ein onvergaetelijk vastelaovessezoen van gaon make. En dao zeen v’r ouch waal aan toe nao de lèste jaore sónger Prins. Prins Frank IV regeertj ónger ziene liefspreuk: “eine daag neet geknoterdj, is eine daag neet gelaef!”

 

Foto: Thieu Smeets, Mofert